چائنیز مانجھا خریدنے، بیچنے، ذخیرہ کرنے اور استعمال کرنے والوں کے خلاف سخت کارروائی کی جائے گی:ضلع مجسٹریٹ

جونپور،11؍جنوری(ایجنسی) چائنیز دھاگے کے استعمال کی وجہ سے پتنگ بازی کے دوران آئے روز حادثات رونما ہو رہے ہیں، جس کی وجہ سے لوگ زخمی ہو رہے ہیں اور کئی جان سے بھی ہاتھ دھو رہے ہیں، جس کے پیش نظر معزز نیشنل گرین ٹریبونل، نئی دہلی کے حکم کی تعمیل کرتے ہوئے ، ضلع مجسٹریٹ ڈاکٹر دنیش چندر نے چینی مانجھا کی فروخت پر مکمل پابندی عائد کرنے کی ہدایات دی ہیں۔ ضلع مجسٹریٹ نے ضلع میں مصنوعی مواد یا مہلک چائنیز مانجھے سے بنے نائیلون دھاگے کی خرید و فروخت، ذخیرہ کرنے اور استعمال کرنے پر مکمل پابندی عائد کرنے اور اس مانجھے کو فروخت کرنے والوں کے خلاف مہم چلا کر موثر کارروائی کرنے کی ہدایت دی ہے۔ ڈسٹرکٹ مجسٹریٹ نے سٹی مجسٹریٹ، تمام سب ڈسٹرکٹ مجسٹریٹس اور تمام ایریا مجسٹریٹس کو سختی سے ہدایات جاری کی ہیں کہ اگر کوئی اہلکار جس کے علاقے میں چائنیز مانجھا فروخت ہوتا ہوا پایا گیا اور کوئی ناخوشگوار واقعہ پیش آیا تو اس کے خلاف بھی تادیبی کارروائی کی جائے گی۔