روہت شرما کی کٹک میں شاندار سنچری، انگلینڈ کے خلاف چھکوں کی بارش، کئی ریکارڈز ٹوٹے

کٹک میں کھیلے گئے دوسرے ون ڈے میچ میں ہندوستانی بلے باز روہت شرما نے انگلینڈ کے خلاف شاندار سنچری اسکور کرتے ہوئے کئی ریکارڈ توڑ دیے۔ روہت نے 76 گیندوں میں سنچری مکمل کی اور اس کے بعد 90 گیندوں میں 119 رنز کی دھواں دار اننگز کھیلی، جس میں 12 چوکے اور 7 چھکے شامل تھے۔ ان کی اس اننگز نے ہندوستان کو ایک مضبوط بنیاد فراہم کی۔ جس وقت روہت شرما آوٹ ہوئے ہندوستان کا اسکور 29.4 اوور میں 3 وکٹ کے نقصان پر 220 رن تھا۔انگلینڈ نے پہلے بیٹنگ کرتے ہوئے ہندوستان کو 305 رنز کا ہدف دیا تھا، جس کے جواب میں روہت اور ان کے اوپننگ ساتھی شبھمن گل نے شاندار آغاز فراہم کیا۔ دونوں بلے بازوں کے درمیان 136 رنز کی پارٹنرشپ ہوئی۔ شبھمن گل نے 52 گیندوں پر 60 رنز بنائے، جس میں 9 چوکے اور ایک چھکا شامل تھا۔روہت شرما کے ون ڈے کیریئر کی یہ 32ویں سنچری تھی اور یہ ان کے کیریئر کی دوسری سب سے تیز سنچری ثابت ہوئی۔ ان کی سب سے تیز سنچری 2023 میں افغانستان کے خلاف دہلی میں بنی تھی، جب انہوں نے محض 63 گیندوں میں سنچری مکمل کی تھی۔ اس کے علاوہ، 2018 میں ناٹنگھم میں انگلینڈ کے خلاف 82 گیندوں میں اور اسی سال گواہاٹی میں ویسٹ انڈیز کے خلاف 84 گیندوں میں بھی سنچری بنائی تھی۔روہت نے اپنی سنچری چھکا مار کر مکمل کی اور میچ میں چھکوں کی بارش کر دی۔ ان کی اس اننگز نے ہندوستان کے لیے فتح کی راہ ہموار کی۔روہت شرما کے اب تک کے تیز ترین ون ڈے سنچریوں کی فہرست درج ذیل ہے:1. 63 گیندیں – بمقابلہ افغانستان، دہلی 2023.2. 76 گیندیں – بمقابلہ انگلینڈ، کٹک 2025۔3. 82 گیندیں – بمقابلہ انگلینڈ، ناٹنگھم 2018۔4. 82 گیندیں – بمقابلہ نیوزی لینڈ، اندور 2023۔5. 84 گیندیں – بمقابلہ ویسٹ انڈیز، گواہاٹی 2018۔اس کارکردگی کے بعد ہندوستانی ٹیم کے حوصلے بلند ہو چکے ہیں اور وہ سیریز میں مزید مضبوط پوزیشن میں آ گئی ہے۔