نئی دہلی، 25 جنوری (ایجنسی) دہلی کی وزیر اعلیٰ آتشی نے کہا کہ عام آدمی پارٹی (آپ) کی حکومت نے مفت بجلی، پانی، تعلیم، صحت اور دیگر خدمات فراہم کرکے دارالحکومت دہلی کے لوگوں کو بڑی راحت پہنچائی ہے ۔آج یہاں چھترسال اسٹیڈیم میں منعقدہ یوم جمہوریہ کی تقریبات کے موقع پر محترمہ آتشی نے کہا کہ آپ حکومت نے مفت بجلی، پانی، تعلیم، صحت اور دیگر خدمات فراہم کرکے دہلی کے لوگوں کو بڑی راحت پہنچائی ہے ۔ دہلی حکومت اپنے بجٹ کا 25 فیصد بچوں کو اچھی تعلیم دینے پر خرچ کرتی ہے ۔ پورے ملک میں صرف دارالحکومت میں 2 4 گھنٹے بجلی ہے ۔ گزشتہ سال شدید گرمی کے دنوں میں بھی بجلی کی کٹوتی نہیں ہوئی تھی۔ آج دہلی میں روزانہ 11 لاکھ خواتین مفت سفر کا فائدہ اٹھا رہی ہیں، جس سے معیشت میں ان کی شراکت میں اضافہ ہوا ہے ۔ پچھلے 10برسوں میں ہم نے 38 فلائی اوور بنانے کے ساتھ ساتھ سڑکوں، میٹرو اور بسوں کی تیزی سے ترقی کی ہے ۔ آج ہم سب دہلی کی ہر عورت کو بااختیار بنانے اور سب کو اچھی تعلیم، صحت کی سہولیات اور روزگار فراہم کرنے کا عہد کرتے ہیں۔وزیراعلی نے کہا کہ آج کا دن ان آزادی پسندوں کو یاد کرنے کا دن ہے جنہوں نے ملک کی آزادی کے لیے اپنی جانوں کا نذرانہ پیش کیا۔ بابا صاحب ڈاکٹر امبیڈکر نے ہندوستان کی آزادی کے بعد ہمارے ملک کو آئین دیا۔ آج کا دن ان عظیم لوگوں کو یاد کرنے کا دن ہے جنہوں نے ایک آزاد ہندوستان کا خواب دیکھا اور اس خواب کے لیے اپنی جانیں قربان کیں۔ جب ہندوستان پر انگریزوں کی حکومت تھی، ہندوستان بہت مختلف ہوا کرتا تھا۔ ہندوستان کے لوگوں کو حقوق حاصل نہیں تھے ۔ ہندوستان کے لوگوں کو اپنے نمائندے چننے کا حق نہیں تھا اور ہمیں بھی اپنے خیالات کے اظہار کا حق حاصل نہیں تھا۔ سب سے بڑی بات یہ تھی کہ ہندوستان کے وسائل پر ہمارا کنٹرول بھی نہیں تھا۔محترمہ آتشی نے کہا کہ ہندوستان کی آزادی کے بعد بابا صاحب امبیڈکر کی قیادت میں دستور ساز اسمبلی میں ہندوستان کا آئین لکھا گیا تھا۔ انہوں نے آئین اس خواب کے ساتھ لکھا کہ ہم ایک ایسا ملک بنائیں گے جہاں ہر فرد کو برابر کے حقوق حاصل ہوں گے ۔ ہم ایک ایسا ملک بنائیں گے جہاں کوئی تفریق نہیں ہو گی، جہاں جمہوریت میں ہر فرد کو مساوی حقوق حاصل ہوں گے اور جہاں کوئی بڑا یا چھوٹا، امیر یا غریب نہیں ہو گا۔ بابا صاحب اور آزادی پسندوں کے خواب کو پورا کرنا ہماری ذمہ داری ہے ، کیونکہ ان کے ساتھ ساتھ لاکھوں لوگوں نے قربانیاں دی ہیں، جن کے نام تک ہم نہیں جانتے ۔ ان کے خوابوں کی تکمیل سے ہی ہم ان کی قربانیوں کا قرض چکا سکتے ہیں۔
